P I N A P A N G A R A P N A B I T U I N ni Kristellia Macale

Sa gabing madilim, ako’y tulala,

Nakadungaw sa aking bintana.

Nangangarap ako habang naghihintay,

Sa mga bituing unti-unting sumisilay.

Una’y pangarap ay maging pintor,

Pagkat ang gusto’y pintahin ang mundo

Na may kasiyahan at kagalakan,

Nang lumabas ang kanyang kagandahan

Hindi naglaon, ang isipa’y nagbago,

Ngayon ang gusto’y maging isang guro.

Upang magturo ng mabuting asal.

Bumasa, sumulat, at mag-aral.

Husto na itong pangangarap ko

Pagkat ang isipa’y gulong-gulo

Di malaman kung anong gusto,

Mabuti pang matulog na ako.

Nang ako’y mahiga at sa aking pagtulog

Isang bagay lamang ang nakahubog

Na baling-araw ay mahahanap ko rin

Ang aking pangarap na bituin.